کراچی (چیغہ نیوز) – کراچی میں سول اسپتال کے قریب عید گاہ پولیس کی کارروائی کے دوران موٹر سائیکل چوری میں ملوث پولیس اہلکار کو گرفتار کر لیا گیا۔
پولیس کے مطابق گرفتار ملزم تھانہ گارڈن میں تعینات تھا اور حال ہی میں پولیس فورس میں شامل ہوا تھا۔ تحقیقات میں انکشاف ہوا کہ ملزم نے ستمبر 2024 میں تھانہ عید گاہ کی حدود سے 125 سی سی موٹر سائیکل چوری کی تھی، جس کا اس نے اعتراف بھی کر لیا ہے۔
چوری کی واردات کا مقدمہ تھانہ عید گاہ میں پہلے سے درج تھا۔ گرفتار اہلکار گارڈن ہیڈ کوارٹر میں رہائش پذیر تھا۔ مزید تفتیش کے لیے ملزم کو اینٹی وہیکل لفٹنگ سیل (AVLC) کے حوالے کر دیا گیا ہے۔
پولیس کا کہنا ہے کہ دیگر کارروائیوں میں دو مزید ملزمان، سلمان اسحاق اور زین، کو بھی گرفتار کیا گیا ہے۔ ملزم زین نے اپنے ساتھیوں کے ساتھ رمضان المبارک کے دوران کولڈ ڈرنک کے گودام میں ڈکیتی کی واردات کی تھی، جس میں ملزمان نے دو موبائل فون اور ایک لاکھ روپے نقدی لوٹ کر فرار ہو گئے تھے۔ جبکہ سلمان اسحاق ایک خاتون کا موبائل فون چوری کرنے کے واقعے میں ملوث پایا گیا ہے۔
