بالی ووڈ کی معروف اداکار جوڑی رنبیر کپور اور عالیہ بھٹ کی بیٹی راہا کپور کی معصومانہ انداز میں میڈیا کو کرسمس کی مبارک باد دیتے ویڈیو سوشل میڈیا پر وائرل ہو گئی۔
سوشل میڈیا پر وائرل ویڈیو میں دیکھا جا سکتا ہے کہ رنبیر کپور اور عالیہ بھٹ اپنی بیٹی راہا کپور کے ساتھ کرسمس پارٹی میں شرکت کے لیے پہنچے تو پہلے عالیہ گاڑی سے باہر نکل کر آئیں اور وہاں موجود فوٹوگرافرز سے کہا کہ اونچی آواز میں بات مت کیجیے گا، ورنہ راہا ڈر جائے گی۔
View this post on Instagram
اس کے بعد رنبیر کپور بیٹی راہا کو گود میں اُٹھائے گاڑی سے نکل کر آئے تو راہا نے والدہ عالیہ بھٹ کی توقعات کے برعکس میڈیا کو دیکھ کر بہت اعتماد کے ساتھ مسکرا کر اپنے معصومانہ انداز میں کرسمس کی مبارک باد دی اور اپنے والدین کے ساتھ تصاویر بنوائیں
صرف اتنا ہی نہیں، ننھی راہا نے تصاویر بنوانے کے بعد جاتے ہوئے میڈیا کو بہت خوبصورت انداز میں الوداع بھی کہا۔
راہا کپور کی کرسمس کے موقع پر وائرل ہونے والی تصاویر اور ویڈیوز کو سوشل میڈیا صارفین کی جانب سے بہت پسند کیا جا رہا ہے اور ان پر دلچسپ تبصرے بھی کیے جا رہے ہیں۔
یاد رہے کہ رنبیر کپور اور عالیہ بھٹ نے 14 اپریل 2022ء کو شادی کی تھی اور اس جوڑی کے ہاں 6 نومبر 2022ء کو بیٹی ’راہا کپور‘ کی پیدائش ہوئی تھی۔
