لندن (چیغہ نیوز)
یوکرین کے صدر ولادیمیر زیلنسکی کو برطانوی وزیر اعظم کیئر سٹارمر نے ہفتے کے روز ڈاؤننگ سٹریٹ پر گرم جوشی سے گلے لگا کر خوش آمدید کہا۔ اس سے ایک دن قبل زیلنسکی کا وائٹ ہاؤس میں امریکی صدر ڈونلڈ ٹرمپ کے ساتھ سخت جملوں کا تبادلہ ہوا تھا۔
نیوز 18 کے مطابق اس ملاقات میں برطانیہ اور یوکرین کے درمیان تین ارب یورو (3.1 ارب ڈالر) کا قرض معاہدہ طے پایا، جس کا مقصد کیف کی دفاعی صلاحیتوں کو مضبوط بنانا ہے۔ یہ معاہدہ ایسے وقت میں ہوا جب زیلنسکی کی ٹرمپ کے ساتھ ملاقات تنازعے کا شکار ہوگئی تھی اور اطلاعات کے مطابق انہیں اور ان کی ٹیم کو وائٹ ہاؤس سے باہر نکال دیا گیا تھا۔
یوکرینی صدر ہفتے کے روز لندن اسٹینسٹڈ ایئرپورٹ پہنچے، جہاں وہ سیدھا برطانوی وزیر اعظم سے ملاقات کے لیے روانہ ہوئے۔ ڈاؤننگ سٹریٹ پہنچنے پر ان کے قافلے کا عوام کی طرف سے خیرمقدم کیا گیا، جس کے بعد سٹارمر نے انہیں گلے لگایا اور تصاویر کے لیے پوز دیا۔ بعد ازاں دونوں رہنما ملاقات کے لیے روانہ ہوئے۔
یہ ملاقات اتوار کو ہونے والے یورپی رہنماؤں کے وسیع اجلاس سے قبل ہوئی، جس کے بارے میں برطانوی حکومت نے کہا کہ اس کا مقصد یوکرین کے لیے “منصفانہ اور پائیدار امن” کو یقینی بنانا ہے۔ملاقات کے دوران کیئر سٹارمر نے زیلنسکی کو یقین دہانی کرائی کہ برطانیہ یوکرین کی مکمل حمایت جاری رکھے گا۔ انہوں نے کہا کہ برطانیہ بھر میں یوکرین کے لیے زبردست حمایت موجود ہے اور یہ حمایت “جتنی دیر تک ضرورت ہو” جاری رہے گی۔
