استنبول (چیغہ نیوز)
ترکیہ میں ایک طاقتور زلزلہ آیا جس کی شدت 6.2 ریکارڈ کی گئی۔ یہ زلزلہ دوپہر 12 بج کر 49 منٹ پر پیش آیا اور اس کا مرکز استنبول سے تقریباً 73 کلومیٹر دور، زمین کے 10 کلومیٹر نیچے تھا۔ زلزلے کے جھٹکے نہ صرف ترکیہ بلکہ یوکرین، یونان، رومانیہ اور بلغاریہ سمیت دیگر یورپی ممالک میں بھی محسوس کیے گئے۔
امریکی جیولوجیکل سروے کے مطابق، اس زلزلے کے بعد دو شدید آفٹر شاکس بھی آئے جن میں سے ایک کی شدت 4.5 اور دوسرے کی 5 تھی۔ دونوں جھٹکوں کی گہرائی بھی 10 کلومیٹر ریکارڈ کی گئی، اور ان کا مرکز استنبول سے بالترتیب 39 اور 63 کلومیٹر دور تھا۔
ترک ڈیزاسٹر اینڈ ایمرجنسی منیجمنٹ اتھارٹی کے مطابق، صرف 40 منٹ کے دوران استنبول میں تین بار زلزلے کے جھٹکے محسوس کیے گئے۔ اگرچہ کسی جانی نقصان کی فوری اطلاع موصول نہیں ہوئی، لیکن زلزلے کے بعد شہریوں میں خوف و ہراس پھیل گیا اور متعدد افراد نے حفاظتی اقدامات کے طور پر عمارتوں کو خالی کر دیا۔
العربیہ انگلش کے مطابق، باسفورس کے دونوں کناروں—یورپی اور ایشیائی ساحلوں—پر واقع علاقوں میں بھی زلزلے کا اثر دیکھا گیا۔
صدر رجب طیب اردوان نے ایکس (سابقہ ٹوئٹر) پر بیان دیتے ہوئے کہا کہ وہ صورتحال کا قریبی جائزہ لے رہے ہیں، اور شہریوں کو ممکنہ آفٹر شاکس کے دوران احتیاطی تدابیر اختیار کرنے کی ہدایات دی گئی ہیں۔
استنبول کے گورنر آفس نے وضاحت کی ہے کہ تاحال کسی عمارت کے گرنے کی اطلاع نہیں ملی، تاہم شہریوں سے اپیل کی گئی ہے کہ وہ غیر محفوظ عمارتوں کے قریب جانے سے گریز کریں اور پرسکون رہیں۔
ترک نشریاتی ادارے ٹی جی آر ٹی کے مطابق، عام تعطیل کے دوران پیش آنے والے اس زلزلے کے دوران ایک شخص بالکونی سے چھلانگ لگا کر زخمی ہو گیا۔
